Almaniyanın nəhəng avtomobil istehsalçıları “Porsche” və “Audi” artan iqtisadi çətinliklər fonunda yeni qənaət proqramlarını açıqlayıblar.
Sesxeber.com “Tagesschau” xəbər xidmətinə istinadla bildirir ki, Almaniyanın məşhur idman avtomobilləri istehsalçısı “Porsche”, “IG Metall” həmkarlar ittifaqı və Şirkət Şurası ilə əldə olunmuş yeni “Future Package” (Gələcəklik Paketi) müqaviləsi çərçivəsində 2035-ci ilə qədər daha 5 000 iş yerini ixtisar etmək barədə razılığa gəlib.
Əvvəllər razılaşdırılmış 3 900 ixtisar və qeyri-əsas 3 törəmə şirkətin bağlanması ilə itirilən 500-dən çox ştat vahidi ilə birlikdə ümumi ixtisarlar təxminən 9 000 iş yerinə çatır. Bu isə şirkət işçilərinin təxminən 5-də bir hissəsi (20%-i) deməkdir.
İxtisarların əsasən təbii işçi axını, erkən pensiya və qarşılıqlı razılaşma əsasında həyata keçiriləcəyi, 2035-ci ilədək isə istehsalat səbəbindən məcburi işdən çıxarmaların olmayacağı bildirilib. Eyni zamanda, “Porsche” 2035-ci ilədək Zuffenhauzen və Vaysaxdakı müəssisələrinə 2,1 milyard avro sərmayə yatıracaq.
“Audi” isə xərclərin azaldılması proqramını daha da sərtləşdirəcəyini açıqlayıb. Ötən il şirkət 2029-cu ilədək 7,5 min iş yerinin ixtisar olunacağını elan etmişdi. “Audi”, həmçinin maliyyə proqnozunu aşağı salaraq illik gəlir gözləntisini 58-63 milyard avroya endirib. Bu, aprel proqnozundan 5 milyard avro azdır. Şirkətin ikinci rübdə xalis mənfəəti isə illik müqayisədə 21 faiz azalaraq 563 milyon avro təşkil edib.
