Lionel Messi Argentina milli komandasındakı son matçından sonra azarkeşlərə müraciət edərək, artıq milli formanı geyinmək üçün darıxdığını etiraf edib.
Sesxeber.com xəbər verir ki, əfsanəvi hücumçu sosial şəbəkə hesabında vida paylaşımı edib.
“Dünən mənim son oyunum idi və mən artıq bu mavi-ağ forma üçün darıxıram. Doğru qərar verdiyimi bilirəm. Bu, böyük sevinclərlə yanaşı, müəyyən məyusluqlarla dolu inanılmaz bir yol idi. Ancaq dəqiq bilirəm ki, bu yolda atılan hər bir addıma dəyərdi.
Hələ deyəcəyim çox şey var. Hiss etdiklərimin hamısını bir neçə sözlə və ya tək bir paylaşımla ifadə etmək qeyri-mümkündür. Ən çətin anlarda belə yanımda olan və məni dəstəkləyən ailəm olmasaydı, bu yol mümkün olmazdı.
Birlikdə çalışdığım dostlarım, bütün komanda yoldaşlarım, məşqçilərim və onların heyəti də eyni dərəcədə vacib idi. Və ölkəmizi layiq olduğu yerə qaytaran Dieqonu da unutmaq istəmirəm. Həmişə dediyim kimi, onun həm yanımızda, həm də göylərdən bu yolun hər addımında bizə kömək etdiyini bilirəm.
Çıxış etdiyim klublara da milli komandanın formasını geyinmək vaxtı çatanda hisslərimə hörmətlə yanaşdıqlarına görə təşəkkür edirəm.
Və əlbəttə ki, Tanrıya minnətdaram. Onun öyüdü və iradəsi olmasaydı, bu məqama çatacağımızı xəyal belə edə bilməzdik. Sonsuz dərəcədə minnətdaram. Sizi çox sevirəm, sizin üçün darıxacağam və yanımızda olduğunuz üçün həmişə təşəkkür edəcəyəm”, – deyə Messi vurğulayıb.
Argentinalı ulduzun bu paylaşımına Kriştianu Ronaldu da şərh yazaraq böyük hörmət və səmimiyyət nümayiş etdirib.
“Leo, uzun illər ölkəni təmsil etdin və arxanda həmişə yaddaşlarda qalacaq bir tarix qoydun. Argentina ilə əldə etdiyin hər şeyə görə böyük ehtiramımı bildirirəm. Qucaqlayıram”, – deyə Ronaldu yazıb.
