Rusiyanın Tula vilayətində yerli sakinlərdən hədə-qorxu yolu ilə pul aldığı bildirilən mütəşəkkil cinayətkar dəstə hüquq-mühafizə orqanları tərəfindən saxlanılıb.
İstintaqın məlumatına görə, hadisələrdən biri 2024-cü ilin payızında baş verib. Dəstə üzvləri bir kənd sakinini əsassız şəkildə narkotik vasitələrin satışı ilə əlaqələndirərək onun avtomobilini saxlayıb, daha sonra zorla meşəlik əraziyə aparıblar. Onlar şəxsi ölümlə hədələyərək 100 min rubl ödəməsini tələb ediblər.
Həyatından narahat olan zərərçəkən borc pul götürərək tələb olunan məbləği şübhəlilərin bank hesabına köçürüb. Bundan sonra dəstə həmin şəxsin dostunu da hədəfə alıb və onu 50 min rubl verməyə məcbur edib.
Araşdırmalar zamanı müəyyən edilib ki, 2025 və 2026-cı illərdə daha iki yerli sakin müxtəlif kompromatların yayılacağı hədəsi ilə şantaj olunub. İstintaqın məlumatına əsasən, zərərçəkənlərdən ümumilikdə 1 milyon 450 min rubl məbləğində pul alınıb.
Faktla bağlı cinayət işi açılıb, saxlanılan şəxslərlə bağlı istintaq tədbirləri davam etdirilir.
