Bakının Mərkəzi Parkında yerləşən və “Təndir hamamı” kimi tanınan XIX əsrə aid memarlıq abidəsinin, eləcə də yaxınlığındakı qədim su quyusunun məlumat lövhələrinin yoxa çıxdığı bildirilir.
Sesxeber.com bildirir ki, bu barədə “Bakı Gündəliyi” məlumat yayıb.
Paylaşılan fotolardan su quyusunun ətrafındakı örtük daşlarının da qoparaq dağıldığı görünür.
Məlumata görə, “Təndir hamamı” XIX əsrdə inşa olunub. Abidə və onun yaxınlığında yerləşən su quyusu 2024-cü ildə təmir və bərpa edilib.
Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətdən bildirilibdi ki, həmin lövhə ərazidə abadlıq işləri görülərkən qoyulub:
“Mərkəzi Parkın ərazisində yerləşən və “Təndir hamamı” (inventar nömrəsi 3757 ) kimi tanınan tikili yerli əhəmiyyətli memarlıq abidəsidir. Abidənin mövcud vəziyyətinin qorunmasına Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Bakı Regional İdarəsi tərəfindən nəzarət həyata keçirilir. Abidədə 2025-ci ildə bərpa işləri aparılıb.
Hazırda mərhələli şəkildə həyata keçirilən layihə çərçivəsində tarix-mədəniyyət abidələrinə məlumat lövhələrinin quraşdırılması işləri davam etdirilir. Ötən il ərzində 1282 tarix-mədəniyyət abidəsində məlumat lövhəsi quraşdırılıb. Həmin hamama da Dövlət Xidməti tərəfindən məlumat lövhəsinin quraşdırılması nəzərdə tutulur.
Hamama və onun yaxınlığında yerləşən su quyusuna məlumat xarakterli lövhə Dövlət Xidməti tərəfindən qoyulan standart lövhə deyil. Həmin lövhə ərazidə abadlıq işləri görülərkən qoyulub. Lövhənin yararsız hala salınması məsələsinin araşdırılması Dövlət Xidməti tərəfindən diqqətdə saxlanılacaq”.
