Tanınmış irlandiyalı idmançı Konor Makqreqor beş il davam edən fasilənin ardınca yenidən peşəkar idman səhnəsinə dönür. Onun amerikalı rəqibi Maks Holloueylə görüşü “UFC 329” turnirinin mərkəzi döyüşü kimi tarixə düşəcək. Bu döyüş iyulun 12-si Bakı vaxtı ilə səhər 5-də, Los-Anceles şəhərində baş tutacaq.
Sesxeber.com TASS-a istinadla məlumatına əsasən, ötən 5 il müddətində Makqreqor bir neçə dəfə oktaqona geri dönəcəyinin anonsunu verib. Fanatlar, əsasən, onun Maykl Çandlerlə qarşılaşacağına ümid etsələr də, Çandler məhz bu gözləntilər səbəbindən karyerasına faktiki olaraq böyük zərbə vurub.
Makqreqor isə kənar şəxslərin fikirlərinə əhəmiyyət verməyərək ən uyğun zamanı gözləyib və görünür ki, həmin məqam artıq yetişib. Yaşının 37 olmasına baxmayaraq, irlandiyalı idmançı həm zahiri görünüşü, həm də fiziki durumu ilə döyüşə hazır və mükəmməl formada olduğunu nümayiş etdirir.
Qeyd edək ki, Makqreqor 2013-cü ildə hakimlərin qərarı nəticəsində Hollouey üzərində qələbə qazanıb. İdmançı hazırda da eyni nəticəni təkrarlamaq niyyətindədir. Bununla yanaşı, irlandiyalının əldə edəcəyi qonorarın məbləği də fərqli olacaq. Mediada yayılan xəbərlərə əsasən, o, yalnız oktaqona çıxdığı üçün 10 milyon dollardan artıq gəlir əldə edəcək. Həmçinin bura müxtəlif əlavə bonuslar da daxildir. O, əvvəlcə Ağ Evdə təşkil olunacaq UFC turnirində çıxış etməyi nəzərdə tutsa da, görünür, müzakirələr planlaşdırılandan daha çox vaxt aparıb.
Maks Hollouey ilə qarşılaşma Makqreqorun mövcud UFC müqaviləsi çərçivəsindəki yekun döyüşü sayılacaq. Bu görüşdən sonra o, sərbəst agent statusu alacaq və təşkilatla yeni müqavilə bağlamağı planlaşdırmır. Gələcəkdə isə idmançı arzu edərsə, bloqer Ceyk Polun idman promouşenində və ya Amerikanın peşəkar sərbəst güləş təşkilatı olan “RAF” liqasında mübarizə apara bilər.
